Yo, Inaciu Galán

 Soi Inaciu Galán y González, ñací en Xixón el seis de xunu de 1986. Anguaño soi redactor de los periódicos dixitales Asturnews.com y Lliteratu.com, presento l’espaciu televisivu ‘Al Aldu: Xente de casa’ na TPA, un programa nel que cuento les noticies internacionales más rares. En radio toi al cargu de los espacios ‘Falando d’Asturies’, ‘Xixón de cerca’ y ‘Les buenes noticies’ na cadena SER. Dacuando collaboro cola revista ”AGE”. Pero nesto de los medios llevo yá tiempu, ente 2003 y 2005 dirixí y presenté los programes Xuventú d’anguaño y Asina foi… el Surdimientu na emisora Onda Peñes, el primeru taba empobináu al públicu mozu y facíalu con Maruxa Ceñera y el segundu yera un programa d’entrevistes culturales empobinaes a cuntar la hestoria del asturianismu nos últimos trenta años. Por esti últimu programa recibí nel añu 2005 el Premiu “Enriqueta González Rubín” de Periodismu, otorgáu pol Principáu d’Asturies. Foi un reconocimientu bien importante pa min. Amás en tele entamé mui mozu, faciendo les seiciones ‘El profe de llingua’ y un concursín rellacionáu tamién col idioma d’Asturies Televisión Llocal Xixón. Tamién collaboré nel so día col diariu lletrónicu Asturies.com, onde la trescripción de les entrevistes d’Asina foi… el Surdimientu yeren mui siguíes. Como guionista trabayo dacuando pa programes de la radio y la televisión autonómica pública d’Asturies (RTPA) como Nomes d’Asturies o mesmamente otres seiciones d’Al Aldu.

Otra de les xeres nes qu’embarqué foi la modernización del monólogu asturianu, nesti casu xunto a Benxa Pérez. Y dende 2004 venimos organizando dellos actos alrodiu de lo qu’entamamos a llamar entós “monólogu modernu”. En 2004 presenté la primer gala d’esti nuevu monólogu, que foi restresmitida pela televisión. Nesta xera acompañáronmos xente como Lluis Antón González, Carlos Alba ‘Cellero’ y Toño Caamaño, ente otros.Otru momentu especial pa min foi la espublización nel añu 2006 del primer diccionariu del asturianu con una llingua estranxera, el Diccionariu básicu asturianu-inglés / inglés-asturianu // Introductory Asturian-English / English-Asturian Dictionary nel que trabaye dellos años y que tuvi l’honor de que me prologara Ana Cano, la presidenta de l’Academia de la Llingua Asturiana y decana de la facultá de Filoloxía de la Universidá d’Uviéu.

Tamién trabayé un tiempu xunto a Isaac del Rivero Sr. na edición de la revista de cómics El Gomeru y como escritor tengo testos lliterarios en revistes como Lletres Asturianes, Reciella Malory, La Ratonera, La Nueva Quintana, La Migaya, El Cuirno, El Espinete, Santiago d’Ambiedes… y d’ensayu nes revistes N’ast, AGE y El Gomeru. Tamién escribo en Formientu, que merez mención especial por ser yo quien la fundara en 2006 cola idea de dar un espaciu a los autores más mozos de la lliteratura asturiana, oxetivu que creyo vamos consiguiendo pasu ente pasu.

Na Selmana de les Lletres Asturianes del añu 2006 fui seleicionáu na antoloxía L’álbum de Talía, editada pola Xunta Xeneral del Principáu d’Asturies pa la llectura de testos teatrales polos diputaos y polos mios testos recibí dalgún premiu o accesit, como’l Segundu premiu nel II Concursu ‘Minimorium’ de rellatu hipercurtiu por ‘La viesca n’ochobre’, convocáu por La Voz de Asturies, una Mención Especial nel III Premiu de Poesía de Primavera de Piloña pol poemariu ‘Los Xarrones de l’Alcordanza’, el primer premiu nel I Concursu de rellatu curtiu ‘Muyer y participación’ pol rellatu ‘Suañar en tiempu de guerra’ y el Premiu ‘Pepe Campo’ de monólogu pol testu ‘Los asturianos al volante…’ (a comuña con Isaac de l’Arada, col que suelo escribir dalgunos monólogos) ente otros. Como investigador algamé en 2007 los premios de l’Academia de la Llingua Asturiana ‘Concursu de recoyida de material toponímico’ (que fici con Marta Lozano Carbajal) pol trabayu “Toponimia de La Collá (Siero)” (el mio pueblu familiar) y un accesit nel ‘Concursu de recoyida de material lliterario escrito Federico Fierro G.-Botas’ pola edición y recuperación de ‘Nieve en el puerto’ d’Eladio Verde.

Otra de les xeres que desendolqué foi la de maestru de llingua asturiana na Universidá Popular de Xixón y en cursos pa funcionarios de dellos conceyos asturianos, un trabayu bien prestosu.

Y nel 2006 entamé xunto a Humberto Gonzali la organización de l’Arribada, un alcuentru lliterariu y cultural qu’organizamos añalamente en Xixón y que ta siendo pel momentu tou un ésitu. Agora presido l’Asociación Cultural l’Arribada y siguimos trabayando pa facela crecer cada vegada más con coses como’l Premiu Timón o la edición del periódicu Vagamar, que dirixo y sacamos cada añu pa promocionar l’Arribada y la lliteratura asturiana.