La primer actualización del añu. Emitióse la nueche del 1 de xineru na TPA. Nun tengo pallabres…

http://www.youtube.com/watch?v=pvAXXQwFmFY

Llevo tiempu ensin actualizar por falta tiempu, aprovecho pa colgar un vidiu del mio programa na TPA qu’anda pel youtube. Espero que vos preste.

http://www.youtube.com/watch?v=SRBEjzQCSEQ&eurl=http://rtpanasturianu.blogspot.com/

Esta ye una de les últimes obres que llegó a la mio colección de llibru vieyu. Un llibrín que regaló a los sos soscriptores La Voz de Asturias nel añu 1922 y del que foi autor Nicolás de las Alas Pumariño.

El llibrín ta reeditáu en fascimil pola Academia de la Llingua Asturiana, asina que cualquiera pue tenela en casa por un preciu más que razonable.

El gobiernu d’esti país tien daqué bien prestoso: Siempres tien la capacidá de sorprender a ún. La decisión del equipu del Sr. Areces de negase a la construcción d’una llinia de tren d’alta velocidá pela cornisa cantábrica, ye la última d’estes “sorpreses”.

Na obra de la célebre llinia tán d’alcuerdu gobiernos tan distintos como los de País Vascu (PNV), Cantabria (PRC y PSOE) y Galicia (PSOE y BNG),  ye dicir, toles comunidaes menos l’asturiana. Esto ye lo que se llama “fechu diferencial”. De les trés comunidaes onde ta nel gobiernu el PSOE, ye la nuesa, la única que nun quier que’l so territoriu cuente con un mediu de tresporte rápidu, modernu y ecolóxicu.

Pero, pensándolo bien, tampoco nun sorprende esta decisión del gobiernín. L’aislamientu d’Asturies ye quiciabes l’únicu de los “fechos diferenciales” del nuesu país que se vien afalando nestos trenta años. A lo meyor, con una Asturies bien comunicada diba ser más complicao vendé-y a la xente la yá vieya idea del llastre que supón l’aislamientu pa la nuesa economía y tovía más complicao echá-y la culpa de la mala xestión a esta y otres causes, como Europa, Corea o qué sé yo, un trasgu economista. Asina podemos entender postures hestóriques como la de la variante de Payares, la continuidá del peaxe del Güerna, a pesar de les promeses, les torgues que se punxieron al establecimientu de compañíes aerees y esta nueva decisión de que l’AVE nun pase per Asturies.

El tren que se propón permitiría a Asturies conectar con tol arcu atlánticu y con toa Europa, pero paez que l’executivu asturianu, y esta ye otra teoría mía, debe tener mieu otra vuelta a aquello que cuntaba la Sr. Migoya na llexislatura pasada “si ponemos vuelos baratos los asturianos van dir a Londres y non a Taramundi”. Tengo una idea pa evitar esa fuxida de “malos asturianos” que cada fin de selmana salen d’Asturies: Cortar les carreteres de vienres pela tarde a domingu, xueves o llunes incluyíu si hai festividá con ponte. Cualquier día…

Pero tornando al tema del tren d’alta velocidá, la idea de negase a esa llinia nun ye namás un perxuiciu p’Asturies. El mesmu presidente gallegu recordó que “diba ser difícil que llegare’l tren a Galicia ensin pasar per Asturies”. A estos que nieguen que l’AVE pase per tierres asturianes pa que pueda llegar a Galicia y al norte de Portugal ye a los que dempués se-yos enllena la boca cola “solidaridá interterritorial”. Al paecer los dirixentes asturianos aleguen un fuerte impactu ambiental y un coste altu. Problemes, estos, que paez que vascos, cántabros y gallegos solucionaron y que l’executivu asturianu nun ve cuando construye un “superpuertu” con grandes sobrecostes y estrozando ún de los cabos asturianos con más valor ecolóxicu. Y eso, ensin cuntar lo que va venir enriba de la esplanada d’El Musel que preparen a los pies del Cabu Torres.

Yá sabemos lo que mos queda nel futuru, les fines de selmana pa Taramundi, queramos o non, y pa dir a Galicia o Bilbao tendremos de garrar un barcu mercante nel nuevu Muselón, como aquellos asturianos que marchaben a facer les amériques, los nuesos güelos, les lleendes urbanes d’entós. Otru tren perdíu p’Asturies.

 Artículu espublizáu n’AsturnewsOpinión

Dende va tiempu tengo por afición coleccionar llibru vieyu n’asturianu. Bono, llibru, cartafueyín y tolo que pille. La verdá que presta percorrer rastros, tiendes de vieyu y dacuando atopar dalguna ayalga. Sobremanera valoro atopar coses d’anantes de 1974. D’aquella xente qu’ensin tener un movimientu asturianista conformáu como tal teníen la xenial idea de continuar la nuesa lliteratura, pa dalgunos probe, pa min interesante, dacuando bien prestosa y ensin dulda con un ésitu social que nun consiguió naide nos trenta años últimos. 

Equí ufro agora un exemplar que llegó va poco a la mio biblioteca ‘Manoxu de Zamploñes (Uviéu, 1924)’, un exemplar en mui males condiciones y que podéis atopar reditáu pola Academia de la Llingua Asturiana en 1998. L’autor ye’l cura Manuel Galán, que por ciertu, nun yera familia de mio, al menos polo que sé pel momentu. El llibru ye un catecismu y forma parte del interés de la Ilesia asturiana d’entós por averase al pueblu, incluyendo la so llingua. Dalgo de lo que podía deprender la Ilesia d’anguaño.

 Manuel Galán García

Presbíteru.

Naz el 14 de xunetu de 1884 en La Cuesta’l Rayu, Parroquia de Samartino, Siero.

Estudia tres años de llatín na preceutoría de La Pola pa, con otros cuatro (Llatín, Filosofía, Teoloxía y Derechu) nel seminariu d’Uviéu, ordenase en 1908.

Foi coaxutor de Coya (1909—1918), ecónomu en Cadavéu (1918—1919), rexidor d’Anes (1920—1924) y párrocu en La Felguera (1924—1944).

En 1945, amalecíu, retírase al Asilu de San Llorienzu de Xixón onde fadrá de capellán hasta la so muerte asocedía’l 20 d’abril de 1947.

(de Lliteratu.com)

Dacuando voi ufiertavos dalguna noticia de les que doi nel programa de la TPA, Al Aldu: Xente de casa, como esta d’una pareya que ta acabante de casase y que tien a l’Arxentina revolucionada.

Esta noticia llega de l’Arxentina, onde un casoriu ta causando una gran polémica. Y ye que la xente nun acaba de creer eso de que… l’amor nun tien edá. La polémica entamó por una pareya formada por un mozu de 24 años y una muyer d’82, una diferencia de cuasi 60 años que nun impidió que se casaren  na ciudá de Santa Fe, 450 kilómetros al norte de Bonos Aires.

Una ceremonia que causó gran espectación.  Reinaldo Wavekche y Adelfa Volpes casaron nel Rexistru Civil de la ciudá arxentina, una hora anantes de lo anunciao, pa evitar a los cientos de persones y periodistes que taben esperando polos novios. La muyer esplicó que vivíen xuntos dende va más d’una década, cuando’l guah.e quedó güérfanu y ella decidió lleválu a vivir a casa pola amistá que la xunía cola madre de Rinaldo.

Ente l’arroz que-yos tiraben a la puerta’l xulgáu la novia comentó que la so rellación ñació basada nel respetu y los y los momentos que compartieron xuntos en tantos años viviendo na mesma casa.  Pero la polémica paez tar dando dalgún beneficiu a la pareya y nestos momentos yá disfruten d’una lluna de miel en Riu de Xaneiru, convidaos pol mesmu alcalde de la ciudá.

Entama la reforma del Estatutu d’Autonomía d’Asturies. Un remocique que pamidea va trayer poques novedaes y nel que les reivindicaciones asturianistes van tener una repercusión bien pequeña, por nun dicir nula. Manifestase va ser la única salida agora. Pero nun pueo escaecer que la manifestación que valía yera la de los ciudadanos votando nel mes de mayu pasáu y qu’esta foi otra oportunidá perdida pa influyir na configuración política del país dende les instituciones. Esa ye la realidá, nun tando nes instituciones, namás queda encomendase a una más qu’improbable asunción del discursu asturianista per parte del PP y el PSOE. A ver si polo menos el 24 de payares consiguimos amosar un apoyu social ampliu pa cola oficialidá del asturianu.